Neit te geluive. De Zeipkiste Race is allang weier achter de rok. ‘t Waor weier ein groot succes d’r is gout en sjteevig geevalueierd en de blik sjteit alweier veuroet gerich nao de race van 2011. Mer waat is ‘t lang sjtil gewaes… Messjiens waor ‘t waal De sjtilte veur de sjtorm dae v’r nog van Volendam hobbe euvergehauwte. Groot nuuts haet Klup Kump Gout in jeeder geval benaader…
Os gewaardeierd lid (saer ‘t begin) Sander zal de eesjte zeen van de vereiniging dae in ‘t huweliks beutje sjtap mit zien maedje Maud. Sander dae van 2004 pes 2008 praeses waor van os vereiniging zal trouwe op 8 september a.s. Inderdaad, de oplettende laezer hauw al gesjaote dat dae daatum oetkump op 8-9-10! Mekkelik te onthauwte dus. Es hae Maud aeve troe zal zeen es os vereiniging kent dat neit mee misse… Kump Gout! Maud & Sander veer wunsje uch heel vool gelok en plezeier saame!
Wae van de leede Sander geit volge is neit bekend… Hoogswaarsjienlik kieke die anger vriegezelle eesj aevekes ‘t kommende vriegezelle feeske aan. Waat dat feeske betruf, dao kenne en wille veer uch (nog) neit te vool vertelle. Daoveur zeen vr uch gaer nog ens trok oppe website.
Vanaaf vandaag is ‘t muigelik om dich in te sjrieve veur de tweede ediese van de Zittesje Zeipkiste Race dae op zondig 13 juni a.s. gehauwte wurt oppe Kolleberg. De veurbereijinge zeen al in volle gank en de eesjte aanmeljinge zeen intössje al benne! Wilt geer ouch mitdoon aan dees zeipkiste race, begin dan vandaag nog te zaege en tummere aan eur eige zeipkis en sjrief uch hiej alvas in. Wilt geer mee infermaase euver deeze daag, kiek dan veural oppe website www.zeipkis.nl.
Published on
11 February 2010 in
Algemein.
Gistermiddig is ut bekende leidje ”Sjiek is miech dat” van Fabrizio oet Mestreich officieel oetgroupe tot carnavalskraker 2010 op radio 3fm.
In de studio van Giel Beelen haet dit leidje mit ein meerderheid (60 procent van de sjtömme) dees wedstried gewonne. Nog veurdat dit bekend is gewoore, hauwe veer van klup kump gout deeze sjeng mit italiaans bloud al vasgelag veur de Bennesjtadzitting 2011! Sjus wie W-dreej hie onger, beteikend dit dat veer inmiddels al twee acts uch kenne prizzenteijere die volgend jaor te bewonjere zeen op de Bennesjtadzitting bie Cafe de Buren!
Ut is dus zeker de muite waerd om volgend jaor aanwezig te zeen bie dees Zitting. Veur noe, Fabrizio, proficiat mit diene kraker en pes ut volgend jaor in zitterd!
In ein finale mit meerdere gouw vastelaovessjlaagers haet W-Dreej aafgeloupe vriejdig (mit aafsjtand) ‘t LVK gewonne. Ein ruume meerderheid van de versjillende sjuuries gouf hun 19 punt aan W-Dreej, hun totaal 128 punte. Klup Kump Gout filleseteird W-Dreej mit hunne sjlaager ‘Vandaag’ En heisj hun alvas van harte wilkom op de bennesjtad zitting van 2011 op 20 fibberwaari wo zie ouch weier akte de présence zulle gaeve.
Vanzelfsjpraekend filleseteiere veer ouch de euverige LVK finaliste en in ‘t bezunjer de twee finaliste oet òs sjtad Trio-046, en Kartoesj!
Volgende waek is ut weijer zo wiet, dan sjteit namelijk de jaorlijkse Bènnesjtadzitting bie Cafe de buren weijer op ut program!
Auch dit jaor höbbe veer in saame wirking mit Cafe de Buren d’r veur gezörg dat geer ein fien program mit artiste krig geprizzenteierd. De artiste die deeze daag zulle komme optrae zeen onger angere; De Toddezek, Bram & Ruud, De Shakin’ DJ’s. Frans Croonenberg, Aafsjlaag Zitterd, Richard Huwae, Thorsten von Lippe Biesterfeld en nog mee en nog mee en nog vööl mee. Ein gevarieierd program volges òs, mer ut wurt nog sjoonder…
Dees Zitting is namelijk gratis te bezuike! Geer laes ‘t gout de entree is vriej deeze daag en zeet geer dus alleney van harte wilkom om saame mit os d’r weier ein onvergaetelijke vastelaovesmiddig van te maake! De zitting zal vanaaf 11 minuute euver 12 beginne. Pès Zondig!
