De kòmmende 3 jaor is ein grote renovaase neudig van de plaatsj wo ooze sjoone Zittesje Vastelaovesoptoch wurd gemaak; De Optochhal. Nao ruum 20 deinsjaore begint ‘t daak te laeke, höbbe de verwerminge hunne beste tied gehad en is ‘t isolatie ouch wiet versjleete… Omdat Klup Kump Gout al die waageboewesj en ‘t Optoch Kommitee zowaal letterlik ès figuurlik neit in de kauw wilt laote sjtaon doon v’r mit aan de teegelkes akctie!
In de hal hink òs eige teegelke dan ouch al fien te sjittere tösse al die angere, en waat kent dao noe baeter op sjtaon es ozze liefsjpreuk “Hauwt Moud, Kump Gout!”. Veer wunsje ‘t Optoch Kommitee vööl sjterkte mit de renovaase van de hal!
Monthly Archive for November, 2009
CHAMPAGNE! Wo veur vraog geer uch mesjien aaf? Klup Kump Gout besjteit vandaag namelik precies 5 jaor! De leede Roger Bormans, Sander Houben, Ramon Houben en Robert Verberne zoute exact 5 jaor geleeje biejein in cafe de buren, sjeevig te pumpele…(pardon) ich mein, drök te euverlegge om ein meneijer te venje om mit de optoch in Zitterd mit te kenne laupe. Dik nao middernach woort dao ut idee gebaore om ein eige vereiniging op te richte om zodoende mit dees groep mit te kenne doon aan de Vastelaovend. En zo geschiedde… Kump Gout woort opgerich en de res is saer dae tied historie! Dees gang van zaake kent geer op uch gemaak tröklaeze in os historie euverzich via deeze link.
De leede die hie baove genuimp zeen viere vandaag auch vanzelfsjpraekend hun 5-jaorig jubileum. Zonger dees heere hauwe veer nooit besjtange en hauwe veer auch nooit zo vööl aktiviteiten en leuke denger kenne ongernumme. Dao zeen veer hun dankbaar veur en wunsje veer hun bie deze alleney proficitat mit de eesjte mielpaol en haope dat zie nog lang lid zulle blieve van os vereiniging. Mesjien hub geer ‘t artikel in de MEM van dees waek al gelaeze dat in ut teike sjtong van ‘t lustrum van Klup Kump Gout. Hiej woort nog ens kort sjtilgesjtange bie de korte historie van os vereiniging en de denger die veer de aafgeloupe jaore höbbe georganiseijerd. Veur degeine dae dit haet motte misse, klik onger dit berich mer oppe link om dit digitaal te laeze.
Veurig weekend höbbe veer mit z’n alle al ein veurpruifke genomme op dit heugelijke feit en höbbe in Volendam dan auch al ein klein feeske gevierd. Vanaovend doon veer dat nog ens fien euver in Cafe de Buren wo alles ontsjtange is. Geer zeet natuurlik auch van harte wilkom om dit mit os te komme viere en zulle veer d’r ein of meerdere drènke op de aafgeloupe 5 jaor en de ludieke jaore die haopelik nog gaon komme! Kump Gout!
- Laes ‘t artikel euver Klup Kump Gout in de MEM via deeze link
Dat waar ut dan. Os jaorlijkse reiske zit d’r weijer op en de kleijer ligge in ut wejsmesjien om de vösjloch d’r oet te kriege. Waat höbbe veer os mit z’n alle drie daag gout geammeseijerd! Nog nooit in de korte historie van os vereiniging zeen veer mit zo väöl leede op reis gewaes es deze keer. Dit jubileum reiske waar daorom auch zeer speciaal en zulle veer os mit z’n alle nog lang blieve herrinere.
Veer höbbe weijer genog mitgemaak deze keer, waat te denke van ein oer-volendamse foto in klederdracht die veer gemaak höbbe, os bezuik aan ein van de meis spectaculaire musea die veer ooit gezeen höbbe en de väöle ludieke momenten die veer in os fien verzörgde ongerkomme höbbe belaef. Al dees denger wille veer uch vanzelfspraekend neit onthauwte, dus daorom kent geer ein oetgebreid versjlaag laeze van al dees belaefenisse. De foto’s en video’s die gemaak zeen kent geer zo wie geweunlik trökvenje is ons fotobouk en media gedeilte. Klik hiej onger op de link om de sfeerimpressie te laeze of es geer neit kent wachte hiej om direk nao os fotobouk te gaon.
Veer wille veuraaf waal alvas de reis organisaase bedanke die dit bezunjere lustrum reiske höbbe bedach en georganiseijerd, alles waar fien verzörg en door de leede van ut eesjte moment prima geregeld.
Op dit moment van sjrieve haet bienao ut voltallige leedebestandj van Klup Kump Gout koers gezat veur òs reiske richting Volendam! Veer zeen vanmiddig rondj de klok van 1 oer beijeingekomme op ein centrale plaatjs in Zitterd en zeen van dao oet vetrokke veur 3 daag mit ein böske richting ut palingdörp.
‘t Zal ein speciaal editie waere, aangezeen dit reiske onger angere ter gelaeg van os vief jaorig jubileum georganiseijerd is. Dao bie zeen veer auch nog nooit op reis gegange mit zo’n groot aantal leede van de klup. Bienao jederein haet 3 daag vriej kenne maake veur dees bezunjere aktiviteit. Veer zeen d’r van euvertuug dat de kommende daag bol zulle sjtaon van de ludieke momente en oetsjpraoke. Veur de meiste reizigers is ut programma onbekend en laote zie zich verrasje mit waat komme geit. D’r zulle auch ongetwiefeld weijer ein ganse rits foto’s en video’s gesjaote waere en wae wit nuut materiaal veur de Zittesje Prive?!
Es veer weijer trök in ‘t Zuuje zeen, zulle dees foto’s en filmkes zo sjnel muigelik geplaatsj waere op dees site. Auch zal d’r dan ein oetgebreide sfeerimpressie gesjreeve waere om uch ein indrök te gaeve euver os belaevenissen. ‘t Waer is alvas gout, neit kauwt en ‘t zunke sjient lekker! Chauffeur, zeen veer d’r bienao? Jao zaet hae…hoogste tied dus om aaf te sjloete! Pès maondig es v’r weier trök zeen in Zitterd.
De nuuj website van Klup Kump Gout wurt mit de daag mee en mee gevöld en oetgebreid. Zo zeen beveurbeeld de profielen mit bieheurende foto’s van alle leede geupdate (te bekieke onger ut köpke klup kump gout – leede van kkg) en is os fotobouk auch flink aangevöld mit foto’s oet de auw doos.
Naeve dees baovegenuimde denger höbbe veer auch nog eine richtige primeur uch de vertelle. Klup Kump Gout is namelik de eesjte vereiniging oet Zitterd en omsjtreeke die ein eige Youtube kanaal haet opgerich! Jederein is vas bekend mit ‘t fenomeen Youtube wo op jeder minuut van de daag filmkes van gans euver de welt te bekieke zeen. Vanaaf vandaag is ut dus auch muigelijk om filmkes te bekieke die in verbandj sjtaon mit os vereiniging op waat veur meneijer dan auch. D’r zeen al ein aantal filmkes geuplaod (o.a. van de afterparty die gister haet plaatsjgevonje) en de kommende waeke / maonje zal os collectie oetgebreid gaon waere mit nuuje unieke opnaames die nooit eerder vertoond zeen en die nog gemaak gaon waere!
Kiek bie ut köpke media op dees website en klik dan op KKG Tube om nao os perseunlijke videopagina te gaon wo losse filmkes te bekieke zeen, of klik hiej onger op de link om direk de ganse collectie te bewonjere.
Bezuik hiej ooze KKG Tube of keis in ‘t menu Media > KKG Tube.
