Sjiek is miech dat! of baeter gezag, sjiek waar miech dat gisteraovend in ut Fortuna stadion in Zitterd. Dao woort namelik de derby gejpeeld tösje Fortuna en MVV. De Trendwork Arena (zo wie ut fortuna stadion vanaaf gister heisj) zout gout vol, went zo’n dikke 7000 luuj volgde dao live de wedsjtried tösje dees twee rivalen oet Limburg.
Dees luuj zouge dat Fortuna neit baeter sjpeelde es MVV, mer waal väöl feller en agressiever waar es die ”Sjengen” oet Mestreich. Dit resulteerde in ein verdeinde 2-0 euverwenning veur de club oet Zitterd! Ut hauw zelfs nog sjoonder kenne zeen es de penalty neit gemis waar door eine fortuna speler. Veur de driede keer op riej wenne van MVV, dat kump neit deks veur! De mitgereidse supporters woorte nao aafloup van de wedsjtried vruntjelik de oetgang geweeze mit op de achtergrondj de inmiddels bekende plaat van fabrizio ”sjiek is miech dat”! Noe vroag geer uch mesjien aaf waat dit nuut mit Klup Kump Gout te maake haet? Diverse leede van de klup waare gister onger angere getuuge van deeze wedsjtried en dao bie draage veer alles waat mit Zitterd te maake haet ein werm hart toe. Daorom zult geer belangriek zittesj nuuts auch zo aaf en toe trökvenje op dees website.
Wis geer trouwens al dat ein lid van KKG regelmaotig midde tösje de ”harde-kern” van Fortuna supporters te venje is? Kiek dan mer sjnel nao de foto via ongersjtoande link en probeijer ein lid van KKG oet dees luuj te plökke. (Ein hint om ut uch mekkelijker te maake, de persoon dae veer zuike haet zeker neit allein aug veur de wedsjried, mer auch veur de camera en wenk os bliej toe!)
- Klik hiej om de foto van dit KKG lid op de Fortuna tribune te bekieke
0 Response to “Sjiek is miech dat!”