Zo, dat waar dat. Haopelik zeet geer allemaol auwt en nuuj gout doorgekomme en hub geer al ein paar gouw daag in ut nuuje jaor achter de rök! 2009 lik noe definitief achter os en begaeve veer os noe in 2010. Dit jaor zal d’r ongetwiefeld weijer genog gaon gebeure; gaon veer kennismaake mit ein nuut saort vogelgriep? wurt ut nederlands elftal mesjien wereldkampioen voetbal in zuid-afrika? en waat sjteit mit de crisis te gebeure?
Allemaol belangrieke zaak, mer vanaovend sjteit minstens zo’n belangrieke gebeurtenis op ut program. In de circustent wurt namelik de nuuje stadsprins veur dit nuuje jaor bekend gemaak. Welke jong oet Zitterd zal dit jaor euveral zien opwachting maake? Is ut eine bekende van os? D’r zeen in de wandelgangen al versjillende naame genuimp mer ut blif toch altied aafwachte. Wie dan auch, veer zeen erg benuujd welke naam vanaovend genuimp geit waere. Es nao vanaovend de nuuje stadsprins van Zitterd bekend is gemaak, kenne veer in eder geval neit meer om de vastelaovend haer.
Veur KKG wurt de kommende tied auch weijer drökker. Veer zulle in eder geval auch dit jaor weijer mitlaupe mit de groote optoch. In welke hoedanigheid is nog neit bekend, mer dat veer mitdoon is zeker! Hauwt de site hiej de kommende tied in de gaate om op de heugte te blieve van de leste ontwikkelingen mit betrekking tot de vastelaovend en os vereiniging.
0 Response to “Wilkom in 2010!”