Monthly Archive for September, 2011

Gister haet  de 37ste editie van ‘t Alternatief Vogelsjeite in Zitterd plaatsjevonje. Aan de vout van de Dominicanenwal höbbe versjillende vereiniginge gesjaote op tempex veugel om oet te maake wae dit jaor de nuuje sjöttekeunin zou waere. Klup Kump Gout waar uiteraard auch weijer present en höbbe veuraafgoand aan ‘t sjeite fien sjpèk mit ei gegaete bie ‘t keuningspaar van aafgeloupe jaor Ramon en Saskia. Nao deeze goeije baom höbbe veer veur ein onvergaetelijk défilé gezörg en de optoch door de sjtad geloupe wo zich toch nog redelijk get luuj hauwe verzameld. Nao eine sjpannende sjeitrunj wo in door eder KKG lid mit sjerp woort gesjaote waar ‘t plotseling toch ein sjeut van eine inmiddels “ervaren” sjötter dae de vogel van de sjtèk leit valle. Daniël Moreaux, de sjöttekeuning én keizer oet 2006, hauw de zenuwen ‘t bèste onger kontrole en sjoot zichzelf opnuuj tot sjöttekeuning. In de finale hauwe veer gehaup op ein vervolg oet 2006, helaas koosj hae neit veur ein stunt zörge door zich opnuuj tot keizer te sjeite. Veer wunsje Daniël in eder geval proficiat mit ziene tweede sjöttetitel, en kieke noe al oet nao ‘t culinaire sjpèk mit ei van volgend jaor!