Aafgeloupe 7 desember waar ‘t weier zowiet. ‘t intössje tradisjonele oetsjtepke nao de krismert in Aoke. Om 12 oere woort d’r verzaameld in de sjtad om vervolges rondj 12:30oer aaf te vaare nao Aoke.
Einmaol aangekomme in Aoke höbbe veer nao lang zuike en de neudige parkeiergeraasjes laater ein feyn plaetsje kenne venje veur òs böske (van Beursgens). Op 2 menuute loupe van ‘t centrum lekker kortbiej in ein of anges sjieke buurt. D’r waor zelfs ein leuk auwt vruike waat os nog naoreip dat zie waal op ‘t böske zou lette. Fien gereegeld dus!
Nao ein kort rundje oppe mert -wo me euveriges euver de köp koosj laope- zeen v’r mit naame door de kauw al flot beland in ein leuk sjtuube om os lekker te werme aan de gluhwein. Einmaol opgewermp hauw me natuurlik de sjmaak te pakke en zeen v’r eigelik direk doorgeloupe nao ‘t meis broene kefee waat veer koosjte venje. Jaomer waor dat me de meziek zo stil hauw sjtaon daste d’r pien van aan de oore krigs. Mèr veer zouwe Kump Gout neit zeen es dat neit Gout Kump. Nao de kaele dus ens gout gesjmeerd te höbbe höb v’r dao mit òs sjraome en baome koor dan ouch mee es nuuj vrunj gemaakt mit zowaal Höllenesj, Pruuse, Engelsje en ein leuk sjtel Belsje!
Wiejer sjlenterend euver de mert zeen v’r weier eine houp leuke getsjets en anger kraom taegegekomme. Van veldjflesje pes theeleigskes en van rendeier oore pes eine sjpreuk tegel mit de teks “Wie es klökchen zu hause klingelt, klingelt es nörges”.
Café Madrid moch natuurlik ouch neit ontbraeke aan de Krismert! Ofsjoon de sjtömming en ‘t personeel dit jaor ein bietje taegeveil höbbe veer os tradisjonele aktiviteite (wie o.a. eine lekkere sjootel mit kees en angere sjpaanse kraom) neit laote vaare.
Einmaol trökgekomme oppe krismert höbbe veer nog ein bezuik gebrach aan die leuke sjtuube wo v’r rondj de klok van teen oere mèr zeen vertrökke. Es aafsjleiting van weier ein gesjlaag oetsjtepke höbbe v’r òs nog get gegaete om ‘t leid van ‘t parkeierbunke te kompenzeiere en zeen v’r om eine hele sjoone tied van 23:30 weier trökgekomme in Zitterd.
Get foto’s:
Volg Kump Gout