16 Augustus 2007 | Nao ‘t succes van os veurige reiske nao de Ardennen, hauwe veer besjlaote om nog eine keer nao dees besjtömming in Belsj aaf te reize. Deil 2 van ein film is meistal sjlegter es de eesjte versie, mer dit waar in ‘t geval van os reiske in eeder geval neit ‘t geval. Waat veer in die 2 daag allemaol gedaon höbbe dao kent geer noe gaon laeze in ongesjtaond versjlaag…vööl laesplezeijer!
Op Donderdigmörge hauwe veer allereesj opnaames gepland veur ‘t programma ”Keizer en zijn Sissi”, ongertusje waal bie uch bekend num ich aan. Al om 10 oere hauwe veer dus dees opnaames bie Cafe De Buren. Ein 7-tal leede höbbe es jury opgetrae in ‘t oetzuike nao de gesjikte Sissi veur ozze keizer Daniël. Nao ein lestige keuze te höbbe gemaak, höbbe veer denkelijk ein gesjikte kandidaat geselecteijerd veur Daniël, en is dit haopelik de juiste persoon veur hööm. De opnames van aflevering 2 van ‘t programma, zeen bennekort weijer te zeen op TVLimburg. Hauwt os site in eeder geval gout in de gaate, en kiek regelmaotig in os Keizer en zijn Sissi item.
Ongeveer ein urke later zeen veer mit 6 man en 2 auto’s vertrokke nao de Ardennen. Sander, Roger, Ramon, Martijn, Luc & Luc höbbe zich ongerwaeg in ein fantastisch waegrestaurant mit 3 sjtarre, ein heerlijke lunch verorberd. In ‘t AC restaurant höbbe veer ein lekker sjtökse vla, Donuts, en get te drenke gepak (en dat veur mer quatrecainq-huitneufeurofrancs: omgeraekend €4,10). Nao dees heerlijke denger waare veer benne eine korte tied aanbelandj bie os huske. Os groep woort verdeilt in 2 groepe van 3. De eesjte groep haet veur 2 daag boodsjappe gaon doon, en die anger 3 höbbe de partytent opgezat, en alles in orde gemaak.
De Barbeque sjmaakte nog baeter es in os eesjte reiske, en höbbe v’r os toegegaete mit frikandelle en hamburgers. Nao dit aete woorte veer waal opgesjrik door ein plotseling sjterfgeval van eine kikker dao veer dao vonje. ‘t bleek nao ongerzuik te gaon om de beroemde Kermit de Kikker. Deeze kermit hauw eine poot aaf, en daorom höbbe veer ‘m dan mer gecremeijerd op os eige gemaakde vuurke. (kermit…’t geit dich gout!). Wie ‘t langzaam duuster (en kauwer woort), höbbe 3 man benne nog ein film gekeeke, en die anger 3 höbbe bie ‘t vuur gezaete. Daonao höbbe veer nog pes 4 oere bie ‘t kampvuur gezaete, en höbbe veer zelfs nog get geleerd ongerwieles dit Reiske. Veer kreegte van Sjram Jesse (geer kent ‘m nog waal van os veurige reiske), precies oetgelach waat de sjtarre baove os noe precies waare, zouge veer ein vallende sjtar, en weite veer noe alleneij precies waat de ISS mot veursjtelle.
Vriedigmörge zeen veer nao ‘t ontbijt (om 1 oer) op waeg gegange nao de plaatsjelijke camping. Hie waar auch ein park(ske) gevestig wo ze beutjes koosj huure, en kens ping-ponge veur €2. Veer höbbe dao eine luxe motorboot gehuurd wo veer mit 6 personen in koosjte. Veer höbbe ongeveer ein urke gevaare evuer ‘t meer haer en trök, höbbe veer eine vösjer eine vösj zeen vange, zeen veer aevkes urges aangemeerd, en zeen veer es stuntmen ein paar keer onger leege takke doorgevaare. Wie ‘t begoosj te raegene, waar de sjpass sjnel draaf, en zeen veer weijer trök gegange nao os huske. Hie höbbe 2 man opgeruimp en NBA gesjpeeld, en is de res nog get kleine boodsjappe gaon doon. Auch höbbe zie in ‘t meer nog gedaoke nao mossjele, die höbbe veer ‘t saoves opgegaete mit vööl sjmaak. Os feesverke Ruud Meuwissen waat dae daag jaorig waar, is vanoet zitterd os komme opzuike mit ein lekker sjtökske greumelevla. Om zien verjaordaag te viere höbbe veer veur hööm nog veur get vuurwerk gezörg. Dit vuurwerk waar metein auch ein ode aan eine zeker J.B.
Veer zeen saame mit Ruud nog drop oet getrokke in de duuster, op zuik nao get actie. Dees actie höbbe veer helaas nurges kenne venje. Auch de geplande koeije-race ging door ‘t kauwe waer neit door. Rondj ein oer of hauf 12 is Ruud saame mit Ramon nao hoes gegange. Zie koosje neit meer bliebe helaas. Daonao höbbe veer os huske omgeboewt tot ein richtige opname studio. Hie höbbe veer ein paar sjieke videoclips opgenomme. Auch höbbe veer ein parodie gemaak, op de parodie van de videoclip van ein stern mit DJ ötzi & Nik. P. Roger & Luc G waare dees artiesten, zörgde Sander veur de opnames, waar Luc B. eine achtergrondj danser, en waare de special effects in henj van Martijn. Nao 22 takes, en 8 videoclips later, zeen veer mer gaon slaupe.
Op Zaoterdigmörge höbbe veer alles in en rondj ‘t huske opgeruump. Aangezeen veer nog verwach woorte op de verjaordaag van Ruud, zeen veer rondj de middig weijer vertrokke oet os vakantiebesjtömming. Nao ein urke rieje bevonje veer os weijer in Zitterd, en zit dit 2e deil van os reikse d’r weijer op.
Of veer nog eine keer trök gaon is nog aafwachte, mer veer bedanke in eeder geval jederein dae dit muigelijk gemaak haet. Kiek veur de foto’s in os fotobouk, of klik op de link veur de diashow. De videocclips die veer gemaak höbbe zulle haopelik zo sjnel muigelijk te zeen waere op dees website. Eesj mot alles nog omgezat waere op DVD, en aafgemix waere. Dus kiek regelmaotig op klupkumpgout.nl zou ich zegge!
Volg Kump Gout