Ardenne 2007

1 Mei 2007 | Os besjtömming van os 2e reiske waar al ein tiedje bie alle leede bekend, en daorom zoute veer noe auch neit de ganse tied in sjpanning. Veer höbbe ein gans weekend doorgebrach in de belsje Ardennen……

Ein 3-tal leede van os klup waare op Vriedig mörge al om 10 oere vertrokke richting os besjtömming. Roger, Ramon en Martijn waare al veuroet gereeje om hiej en dao al get te regele veur es de res van os klup zou komme. De euverige 6 leede zeen om 3 oer weggereeje oet Zitterd.Ruud hauw os ein fien böske geregeld, en haet os de natuur van de Ardennen al ens gout laote zeen. Luc Göttgens waar d’r auch al gans vaerdig veur, de videocamera opgelaaje, Xbox mit, en zelfs ziene eige Barbeque.

Wie veer om ein oer of 6 aankaume bie os verblief, zouge en rooke veer van wiets al ‘t vurke. De veurgengers hauw os de waeg mit rouksignale wille wieze. Dit kaum gout van pas, aangezeen Luc B. dao al meer es 10 jaor neit meer gewaes waar, en hae zich neit meer vööl koosj herrinere. Wie veer os huske bewonjerd hauwe, en os sjpulle hauwe neijergezat, is ein deil van os boodsjappe gaon doon bie de intermarche. Dat zie ein urke later trök kaume mit ein ganse winkelkar vol mit lekker sjpulle veur de barbeque o.a. hauwe veer auch neit gedag. Biej aafwezigheid van Daan Moreaux haet ozze chef BBQ Luc Göttgens òs gout verzörg mit lekker weusjkes en hamburgers. ‘t ‘s Aoves haet jederein zich vermaak in en rondj os huske. Zo höbbe Leroy, Wouter, Martijn en Ramon rightige poker kampioensjappe naogesjpeeld, en zeen Sander, Roger, Ruud, Luc G, en Luc B. in de duuster de bosj ingetrokke. Es ze dao in ‘t pikke duuster sjteis, wits ze auch neit meer of ze veur of achter mos kieke. Euveral heurs of zuus ze waal get, en haet ozze cameraman mit ziene nightshot camera sjpannende opnaames kenne maake. Wie v’r bie ein klein huske aankaume, en d’r op ens eine helle sjlaag te heure waar, höbbe vr ‘t toch op ein laupe gezat. Ongerwieles ozze night-wanjeling kaume veer auch nog ein ganse groep luuj taege mit lempkes oppe kop. Duudelik mirkbaar waor dat die auch ‘t zjweit tössje de batse hauwe sjtaon wie ze os hoorte. Wie v’r trök zeen gegange nao os huske, höbbe vr mit zn alle de video opnames trök gekeeke, en höbbe v’r deeze aovend aafgesklaote zittend rondj ‘t kampvuur, en höbbe veer nog de verjaordaag van os lid Roger gevierd.

Zaoterdigmörge haet Wouter os allemaol getrakteijerd op ein lekker breudje sjpek mit ei. Wie jederein eindelijk wakker waar, en zich gewesje hauw, höbbe v’r wederom os rondj ‘t huske opgehauwte mit klooterieje. Zo is d’r alvas geoefend veur de condor honkbal daag, en woort d’r benne flink geracet en getennist op de Xbox. Smiddigs zeen veer mit z’n alle nao de bosj ingetrokke. Euverdaag is dit toch minder sjpannend es midde in de nach, mer toch neit minder leuk. Hiej höbbe veer auch ein ganse zuiktoch gehauwte nao ein ”lens” van de camera. Dit waar ozze camerman de aovend d’r veur in alle consternatie urges verlaore. Dat veer dees lens nog zouwe trökvenje hauw neemes gedach. Mer wie veer Ruud opens heurde joele van wiets, wist veer waal baeter. Dat die kleine zwarte cameralens in eine bosj van ich weit neit wie groot nog is trökgevonje, is os noe nog ein roadsel. Op de foto hie naeve zeet geer 2 gelökkige luuj. Ozze gids, ”Sjram” Jesse haet os nog verteld euver de sjlaag van de ardennen, en höbbe v’r auch nog get geleerd van dees wanjeling.

Nao dees wanjeling zeen v’r mit 9 man boodsjpappe gaon doon in de intermarche. Hiej höbbe veer os lekke denger veur de BBQ oetgezuik, en höbbe v’r os nog aeve ”quick” get gegaete bie de quick. Nao dit giant breudje höbbe veer rondjgekeeke op de kirmis. Deeze kirmis waar te vergelieke mit de kirmis oet zitterd….neit vööl dus. Waal höbbe ein aantal leede hiej mit sjerp gesjaote, en zich ein plastic-bulkes-pistool gewonne. Bie thoeskoms höbbe veer kennis gemaak mit ozze aardige buurman, en höbbe v’r wederom genaote van de creaties van ozze chef-kok.

Rondj ein oer of 8 höbbe veer os verdeilt in ein 3-tal groepe. Ein groep haet de finale van EK-21 gekeeke op tillevisie, ein groep haet gepokerd, en ein groep haet gevunkeld. Hienao zeen veer mit z’n alle rondj 11 oere vertrokke nao…..geer roajt ‘t al, de bosj. Veer waare op zuik nao avontuur, en dit höbbe veer gevonje. Mit 2 telefoons mit lempkes, höbbe veer os eine waeg gebaand door de enorme bosj. Op ein gegaeve moment höbbe veer eine aafsjlaag gepak, en zeen blieve laupe. ‘t Waor intössje al ein oer of hauf 1, en höbbe v’r ein cruciale faeler gemaak op ein kruutsing wie achteraaf  gebleek is. Inplaatsj van nao rechts te gaon, zeen v’r nao lenks gegange, en zeen veer tot hauf 3 ongerwaeg gewaes, tot dat veer os huske weijer gevonje hauwe. Al mit al waal genog avontuur belaef, en höbbe v’r de gemaakte opnames nog trökgekeeke tot ein oer of 4 snachts, en haet sjram os verlos van ein honderdtal vleige die in de kamer zoute.

Op Zondig mörge höbbe veer weijer os vaste ritueel gevolg. Sjpek mit ei, en vechte om ein plaatsj op de badkamer. Wie jederein zich gewesje hauw zeen veer langzaam begonne mit opruume en inpakke. Aafgewesje, gezuig, gedweild enz….’t huske zoag d’r weijer oet wie nuuj. Rondj ein oer of 5 zeen veer weijer vertrokke nao hoes. Hie höbbe veer os bagage aafgeleverd, en zeen es aafsloeting gaon aete oppe mert bie de buren. Eine lekkere sate mit fritte waar eine gepaste aafsjloeting van dit ”vleisj-weekend”’.

Os reiske waar weijer gesjlaag, en v’r wille bie deeze auch de reis kommissie bedanke veur hun tied en muite. Wo veer volgend jaor haergaon…? Dat wit nog neemes, mer dat veer gaon, dat is zeker!