Op 14 & 15 juni 2008 sjtong òs jaorlijkse Reiske van Klup Kump Gout op ‘t programma. Dit waar alweijer de driede editie van dit jaorlijkse evenement. De reiskomissie hauw dit jaor de reisbesjtömming veur de meiste reizigers geheim weite te hauwte. Allein de vertrektied van 04:45u waar os bekend.
Naodat de 6 leede biejein waare gekomme tösje kwart veur 5 en 5 oer snachs, ginge veer mit ein böske op waeg. Ongerwaeg kreegte veer van de organisatie ein fien ontbijt geserveijerd, en ongerwieles ‘t aete woort d’r gegok waat noe de besjtömming zou waere van dit reiske. Dutsjlandj? Frankriek? Belsj? of toch geweun in Holland? Neemes hauw ‘t gout, want veer waare op waeg nao London!
Ozze chauffeur Ruud reej nao Frankriek in ein sjtrak tempo, en van dao oet zouwe veer mit de boot nao Engelandj vaare. De paspoortcontrole waar al vriej sjerp bie de douane, en waar ederein bliej dat d’r ein geldige ID of paspport bie zich hauw. Einmaol op de baot höbbe veer de tied doorgebrach mit get te aete, get te sjpeele in de sjpeelautomatehal en door geweun get op ‘t dek rondj te hange. Nao ein klein 2 oere vaare, waare veer aangekomme in Engelandj. Os böske woort achtergelaote op ein parking, en zeen toen mit de Londonse metro richting os Hotel gegange. Os hotel woort vriej sjnel bereik, en haet ederein zien sjpulle gedrop. Os hotel waar fien geregeld, mit eine tillevisie mit 2 zenders, ein combie wc – douche (ideaal es ze alles tegeliek mos) , ein deur die zich vanzelf sjloot in mer 22min en sjoon broen afgewirkte bedde. Helaas höbbe veer neit väöl tied doorgebrag in dit hotel.
Nao get gegaete te höbbe vertrokke veer mit de metro nao alleneij sightseeings van London. Zo höbbe veer piccadelly circus, de big ben, national gallery, london eye en buckingham palace allemaol veurbie zeen komme. De NS kent ein veurbeeld numme aan de londonse metro, dit wirk tenminste fatsoenlijk. Veer leipe allemaol rondj in oranje t-shirts. Gelökkig hauw nederland gewonne van frankriek de aovend van te veure, en dus koosjte veer es hollenjers sowieso al neit meer sjtök in engelandj. Väöl luuj die os höbbe aangesjproake euver ‘t voetballe, taxi’s die begoosje te toetere, luuje die holland reipe, en nog väöl meer.
Naodat veer ein paar oer door London hauwe rondjgeloupe zeen veer os get gaon drenke in ein rigtige londonse pub. Dao höbbe veer ein paar (grote) glaaze ”dood” beijer gedronke en zeen toen gaon aete in ein fien sjtaekhouse. Wie veer klaor waare zeen veer opnuuj get pubs aafgegange in de sjtad. Door os oranje shirts sjtonge veer opens op ein guestlist van ein pub, dus es geer auch van plan zeet om nao london te gaon, doog uch get oranjes aan. Ein paar urkes later ginge veer op waeg nao os hotel en zeen mit de metro op tied aangekomme bie os hotel.
Veer waare smurges helaas get te laat op, en daodoor hauwe veer os ontbijt in ‘t hotel gemis. Daodoor zeen veer mer gaon ontbijte bie ein plaatsjelijke subway. Wie veer op waeg ginge richting sjtad höbbe veer nog de wisseling van de wach bie buckingham palace mitgemaak en haet eine chinees os fien op de foto gezat. ‘T grootste Reuzeraad van Europa (wo Erwin van ‘t merretkoer altied euver zingk) höbbe veer opnuuj bezuik. De daag te veure waar ‘t hie enorm drök, mer noe zeen veer toch hie in kenne gaon wiej ‘t neit zo drök waar. Vanoet dit Reuzeraad hauwe veer ein sjoon oetzich op de sjtad, en höbbe veer os geheugekaertje van ‘t fototoesjtel flink vol kenne sjeite. Hie höbbe veer auch nog auch-in-auch gesjtange mit vlugge jaapie (van bassie en adriaan), in engelandj baeter bekend es quick japie.
Hie nao höbbe veer opnuuj enkele sjtaotartieste bekeeke die hiej opnuuj enkele acts hauwe. De ein nog baeter es de anger, hie kent ‘t sjtraotfestival van zitterd-gelaen nog get van leere. Nao ein fiene pizza zeen veer op waeg gegange nao ‘t letste kodak-moment, de london bridge die nog in os rieke ontbrouk. Dit koum precies gout oet in de planning en zeen toen trök gegange nao os böske en op waeg nao de boot. Deeze boot waar luxer es de eesjte , en höbbe veer os hiej nog ein paar urkes kenne ophauwte in de sjpeelhal en bar. Emotioneel moment waar auch nog wie Ruud Meuwissen ein femiejelid oet Engelandj sinds lange tied weijer zoug. Deeze Meeuw(issen) leit häöm nog ein leuk berich achter es herrinering.
Naodat veer op trökreis waare nao hoes zeen veer nog aeve aangelandj bie os allereesjte reisbesjtömming van 2 jaor geleeje. In Gent zeen veer om 12 oer nog op zuik gegange nao ein frituur, en höbbe os in “t böske begaajd aan fritte. Veural lekker es ze die eesj op de grondj gooijts, saame mit ein blikse cola…..sjmaak dan nog baeter!
Rondj 03:00 oer kaume veer aan in Zitterd en zout dit dreide reiske d’r helaas op. Auch dit jaor waar ‘t weijer zeer gesjlaag en höbbe veer eine haup gezeen en gelache. Veer wille de reiskomissie bedanke veur de goeije zörg en organisatie, en haupe dat ‘dr nog meer van dees reiske zulle komme.
Pes Volgend jaor!
Volg Kump Gout