Al maonje sjtòng dit lustrum reiske oppe agenda biej de maonjelijkse vergaderingen. Ã’s oprichtesj hauwe dit jaor de taak op zich genomme om òs jaorlijkse reiske te organiseijere en om d’r get speciaals van te maake omdat os klup exact 5 jaor besjteit! Sander, Roger, Ramon en Robert viere saame mit òs vereiniging hun 5-jaorig jubileum en höbbe de reis nao Volendam veur os oetgezoch en geregeld. Veer bedanke hun alvas veur de organisaase en filleceteijere hun auch mit dit jubileum! Here, uch gouwe sjpengske is besjteld!
Nao de neudige veurbereijing en oetzuikerieje waar ut vriedig 20 november eindelik zo wiet. Om 13:00 oere verzamelde veer oppe parkeerplaatsj de gats om van dao-oet mit ein böske en eine waage richting volendam te trekke.
Ongerwaeges zouwe veer nog her en der get leede oppikke en reisde sommige mit eige vervuijer richting os ongerkomme. De reis ònger leijing van chaufeur Ruud verleip vlekkeloos. In Den Bosch höbbe v’r de eesjte tösjesjtop gemaak om os ‘Sjpek & Ei’ lid Martijn op te pikke. Nao ein korte sightseeing door zien nuuje optrekske maakte veer òs op veur de lètste kilomaetersj richting ‘t palingdörp. Rondj ein oer of hauf 5 reeje veer veurbiej ‘t bördje ”Welkom in Volendam”. Vriej flot daonao arriveijerde veer op ‘t Marinapark wo veer de kommende daag in twee huskes zouwe verblieve.
Einmaol aangekomme troffe veer os leede Arno-Laurent, Jean-Paul en Robert auch en dit beteikende dat veer kompleet waare. 14 Man mer leifs, die 3 daag in Volendam zouwe zitte… ès dat mer gout geit! Ein korte inspectie door de huskes leerde os dat veer mit os naas in de baoter waore gevalle. Nog nooit in de korte historie van òs Klup Kump Gout reiskes höbbe veer in zo’n luxe gewoont es dit jaor. De huskes hauwe besjikking euver eine sauna, twee wee-cee’s, tillevisie, soundsystem en luxe keuke en ‘t gebroekelikke nog mee en nog väöl mee!
Omdat ‘t gezelliger is om gezamelik te aete leipe veer letterlijk benne 5 min nao aankoms al mit de sjtuil en benk euver ‘t park haer om alles in 1 huske te duuje. Ongertösje woorte de boodsjappe veur dees daag ingesjlaage en ging ozze chef-kok Daniël al flink aan de gèng mit ‘t opzette van de BBQ. Veer kreege door häöm ein paar fien sjtökskes kip veurgesjoteld mit frikandelle en lekkere naturel chips. Gelökkig waore ein aantal van òs leede al zo sjlum om ouch get fritte te haole biej de lokaale fritteboet. De “Kip Kump Gout” sjmaakte òs én de Volendamse indrèngster zichtbaar gout! ‘t Eesjte kretje beijer woort meister gemaak en de sjtimmung koum d’r -ònger de klanke van de inmiddels bekende Farbizio- al gout in.
De Volendamse indrèngster waat eigelik ein Volendamse archeologe bleek te zeen noum òs nao ‘t aete mit richting de waalbekende ”Diek” wo alle kroege en kaffeekes te venje zeen. Ein korte wanjeling door ‘t hart van Volendam brach os oeteindelik bie ein kefee mit de naam ”’t Gat van Nederland” wo veer ongeveer 80% van ozze totale tied höbbe doorgebrach. In dit kefee bienao gein Jan Smit meziek wodoor veer òs dus direk op os gemaak vuilde. Dit koum mesjiens auch waal door de vruntjelikke ontvangs van de mee dan sjarmante barvrouw Kim die òs ummer fien van rundjes mit 13 beijer en eine Amaretto-Cassis haet verzörg.
Tot ozze sjrik heurde veer dat de kroege in Volendam mer pès hauf 2 aope waare, dus woort ‘t tempo ein bietje opgesjroef. Sjus op ‘t moment dat eine groep Zeeuwse vrouwluuj kennis maakte mit ‘t vriejwaal voltallige Kump Gout. Daonao vloog de tied letterlijk en figuurlik om, d’r woorte hiej en dao nog get lekkerbekke vermuibelt en woort ‘t sjpelke ”eg of nep” door sommige leede gesjpeeld. Wie ‘t nummer ‘Kwestie van geduld’ woort aangevroag moosjte veer os es Limburgers natuurlik aeve van de beste kantj laote zeen en is ‘t muigelik dat d’r lenks en rechts get luuj van sjrik ‘t glaas oet de henj höbbe laote valle. Wie veursjpeld gonge om hauf 2 inderdaad de lempkes aan en zeen veer de fien route trökgelaupe nao òs huskes, sommige koosje neit mee gans rech laupe en hauwe hiejbiej gèt ongersjteuning neudig van ein (bar)krök. In de huskes ging ‘t fees nog door pès in de late urkes en woort d’r nog duchtig gebroek gemaak van de facaliteite zo wie de sauna en ‘t boetzjwömbad mit neit van ech te ongersjieje aenje en brandjnetele.
‘s Mörges ontwaakte v’r nao eine sjteevige sjlaop wobiej v’r woorte aangetrokke door de sjpek mit ei loch onger oet de keuke. Nao ein fien ontbijtje en eine langzaame sjtart van de daag ging ein deil van de klup zwömme, en bleef ein anger deil plèkke in ‘t huske en laater mit ‘t böske nao ‘t centrum van Volendam en de naeveliggende sjtedje Edam. Hiej koume ziej nog eine plaatsjelikke Sinterklaos taege dae gaer mit os op de foto wol. Hiej zeen veer es Kump Gout natuurlik neit te beroerd veur en höb v’r dae erme miensj ein feuteke gegund. Wiejer zeen veer mit de bös midde in ‘t centrum belandj en hauwe veer ein fien oetzich op de plaatsjelikke mert. Rondj 2 oer ‘s middigs zeen veer trök op hoes aan gegange om dao in ‘t zunke te geneite van ein paar fien gebakke frikedele. Wie jederein opgefrisj en gout wakker waor zeen veer veur 
de tweede keer vertrokke richting de Diek, went hiej sjtòng ‘t aovend programma op òs te wachte. Allereesj zeen veer ein foto gaon maake in Volendamse kleijederdrach. Drie vrouwluuj kreege ‘t vaerdig om 14 man sjterk onger de doem te hauwte en os ein veur ein te veurzeen van de meis muffe kleijaasj mit biejheurende accesoires. Wie jederein gesjteeveld en gesjpaord waor en zich klumpvuitjes aangemeite hauw woorte v’r fien geportretteierd in ein dekor wo zelfs de Zittesje Revuu nog ein puntje aan kent zoege. ‘t Einderesultaat maog d’r dan ouch zeeker zeen! De foto is trök te vènje in òs fotobouk…
Boetgekomme maakte veer kennis mit ozze touroperator dae òs op kroegetoch zou mitnumme dae aovend. Mer veur ‘t zo wiet waor zeen veer os eesj tot de hals gaon toe aete in ein restaurent. Veur hauwe de keuze oet vösj en ein fien sjtökse sate. Dees porties waare flink groot, mer leifs 14! sjtökker vleisj zeen door ongergeteikende geteld. Jaomer genog hauwe veer gein tuutjes bie òs, angesj hauwe vr os nog gèt kenne bewaare veur thoes. Helaas haet ozze gewaardeijerde chef-kok Daniël dees maoltied motte misse aangezeen hae om 6oer al in ‘t koffer belandj waar. Bliekbaar waare al die unieke impressies häöm toch get väöl gewoore. Nao dit aete woorte veer mitgenomme nao de pianobar wo veer ein ludieke palingsound quiz ging doon. Os lid Arneaux sjnapte dit principe neit gans en meinde dat de quiz op tied gespeeld woort. Nog veur dat de eesjte vraog gesteld waar hauw haet dit ganse formulier al ingevöld. Veer höbbe toen mer os eige plan getrokke en zeen nao de karaoke bar gegange wo veer os zangkwaliteiten ten geheure höbbe gebrach. Zelfs beppie kraft leipe veer taege ‘t lief, en de door os aangevroage leidjes van fabrizio en beppie veile bie de Volendammers gout in de sjmaak.
Wie veer os sjtumme zum jaffa geholpe hauwe zeen veer mer wiejergetrokke nao de kroeg wo veer de daag van teveure òs gout geammesijerd hauwe. Veer höbbe òs waal nog versjrokke wie Berry van Rijswijk eine lelijke val van ein krök maakte. Gelökkig woort hae gout opgevange door de omringende vrouwluuj. Auch deeze aovend veil weijer gout in de sjmaak en waar ‘t nog drökker es de daag van te veure. Jederein is gout oet ziene bol kenne gaon en pès ein urke of twee höb v’r òs fien geammeseijerd. Om de honger kwiet te raake hubbe veer os nog get breudjes en fritte besjteld om ongerwaeg te vermuibele. Hiej troffe veer auch nog ein richtige kenmerkende Volendammer aan dae neit van eg te ongersjeije waar. Op de trökwaeg zeen veer enkele leede kwietgeraak en is de groep opgesplits in 3 gedeilte die oeteindelik toch weijer alleney op ‘t zelfde leig aafkoume. De door Wouter mit zien laeve besjermde (gematsjte) fritte sjmaakte nog gout en ouch de sauna woort weijer optimaal benut. Helaas laekde hiej en dao gèt door ‘t plafond en waar pès ònger in de kamer te mirke dat bie de oplevering van ‘t huske toch get neit gans gout waar gegange.
‘s Angerdaags woorte veer letterlik en figuurlik oet òs bed geweijt en raegende ‘t flink. Gelökkig hauw de extra sjlaop ozze chef-kok gout gedaon en trakteijerde hae os op pannekuik gebaseiert op koffiemelk. De fanatieke zwömmers zuikte ‘t zwömbad weijer op en ging de res aan de sjlaag mit opruime en omhoeze van alle muibele. Discovery Channel haet òs door de mörge geholpe en nao ‘t educatieve gedeilte moosjte jaomergenog al enkele leede op hoes aan. De res van de euvergebleeve leede is daonao ein bezuik gaon brenge aan ‘t palingsound museum. Veer hauwe leever ozze eige paling wille ruike, mer wie dit gevraog woort door de organisatie woorte veer aangekeeke of went haet zelf sjus geruik waar. Wie veer de trap opleipe van dit museum hoorte veer van baove al genògzeggende reacties, ‘t museum hauw mee weg van eine kringloopwinkel. Twee kaemerkes groot wo me zich kent vergaape aan eine laserprinter dae nog door jan smit gebroek waar, ein glaas Alfa wo door Nick en Simon aan gedronke is en de vermufde kleijaasj van de oma van Jan Smit zelf. 
Dees onvergaetelike indrökke moosjte veer verwirke en zeen nog mèr ein eine keer richting de diek getrokke om hiej van bie te kenne komme. Op de diek bestelde veer os alleney ein fien sjtökse vösj van de vösjkroam. De bieheurende saus kaum hiej letterlik en figuurlik oet de loch valle, allein jaomer dat neit alles op de vösj zelf veil mer auch gedeiltelijk op de jas. Nao get sightseeing zeen veer oeteinteliks toch mer weijer in ‘t Gaat van Holland belandj om hiej òs nog eine te pitsje en gèt voetbal te kieke. Rondj de klok van 3 höb v’r besjlaote om de waage in te laaje en op hoes aan te trekke. Drie die-hard leede koosjte hiejbiej gein aafsjiet numme van Volendam (of waare ‘t toch de volendammers zelf?) en bleeve pès maondig. De res is mit de bös heivesj gevaare en zeen òngerwaeges nog bie eine Burgerking gesjtop om dit ”gezonje” weekendje in sjtiel aaf te sjleite. De reis verleip vlot, mer v’r waare waal poem gezaete. Bliej waare veer dan auch wie veer om 7 oere weijer in os eige Zitterd belandj waare. Ein veur ein verleite veer de bös ein waar dit reiske dan ouch eg gedaon.
Wat höbbe veer weijer väöl dènger mitgemaak in dees 3 daag. Dit versjlaag hauw nog ein paar pagina’s langer kenne zeen, mer dat zulle veer uch mèr besjpaare. Veer zulle de foto’s en filmkes nog dèks bekieke en trökdenke aan dees onvergaetelike reis. Veer wille de leede die dit alleney verzörg höbbe bedanke en zeen uch gaer volgend jaor weijer trök….wo ein wienee? dat blif ein grote verrassjing! De reiskemisse maog ‘t in jeeder geval nog ein jaorke organiseiere en wie v’r vernomme höbbe zeen zie alweier drök beezig mit de volgende reis. V’r zeen benuujd!
Euver al ‘t gein waat wiejer nog gebeurd is in Volendam höb v’r nog ein dènk aafgesjpraoke… ”What happens in Volendam…stays in Volendam.” Messjiens is ‘t waal eine hint veur de volgende reis, wae wit…
Volg Kump Gout