Klup Kump Gout » Reiskes

Klup Kump Gout op reis in Gent

luc — Wed, 03 Aug 2011 20:26:26 +0000

Inmiddels al weijer 2 waeke geleeje is ein groot deil van os vereiniging aafgereis veur os jaorlijkse reiske nao ‘t boetelandj. Nao ein groot succes in 2006 hauw de reiskemisse besjlaote om opnuuj aaf te reize richting Belsj. De hotelbaot in Gent loug nog ummer op dezelfde plaatsj in ‘t water en deinde deze auch dees editie opnuuj es verbliefplaatsj. Ozze praezes höbbe veer verrasj, door in plaatsj van op zaoterdig, vriedigmörge al te vertrekke richting Gent. Mit meer es 10 man zeen veer Ruud smörgens op zien wirk gaon oppikke en höbbe häöm mitgenomme nao ‘t paintbal centrum in de Kelchterhoef. Hiej höbbe veer officiëel zeen vriegezelle besjtaon gevierd en häöm (nogmaols excuses ruud) letterlijk bontj en blauw gesjaote mit paintball. Nao aafloup zeen veer doorgereis richting ozze privé boot, wo veer op ‘t dèk höbbe genaote van ‘t zunke. 2 daag langk höbbe veer os oetgelaef tösje de Belsje feesgengesj op de Gentse Feeste. Veer höbbe hiej genaote van de sfeer, de meziek op ‘t water, de rondjvaart in de aovendoere en de euverheerlijke all-you-can-aet BBQ. Nao 2 gezellige, lange en vermuijende daag zeen veer op zondig trökgereis richting Zitterd en os jaorlijkse reiske aafgesjlaote. Biej films in de cinéma is de opvolger van ein film, deil 2 ein drama, in os geval waar dit absoluut neit ‘t geval! Wae wit kump d’r nog waal ein triologie aan? wae wit… Veur foto’s van os reiske, kiek in ‘t fotobouk. Veur bewaegend beeld kènt geer op os YouTube kanaal kieke of op de link Media op dees site klikke.

Rös in Volendam weijer trökgekeerd

luc — Mon, 23 Nov 2009 20:02:37 +0000

Dat waar ut dan. Os jaorlijkse reiske zit d’r weijer op en de kleijer ligge in ut wejsmesjien om de vösjloch d’r oet te kriege. Waat höbbe veer os mit z’n alle drie daag gout geammeseijerd! Nog nooit in de korte historie van os vereiniging zeen veer mit zo väöl leede op reis gewaes es deze keer. Dit jubileum reiske waar daorom auch zeer speciaal en zulle veer os mit z’n alle nog lang blieve herrinere.

Veer höbbe weijer genog mitgemaak deze keer, waat te denke van ein oer-volendamse foto in klederdracht die veer gemaak höbbe, os bezuik aan ein van de meis spectaculaire musea die veer ooit gezeen höbbe en de väöle ludieke momenten die veer in os fien verzörgde ongerkomme höbbe belaef. Al dees denger wille veer uch vanzelfspraekend neit onthauwte, dus daorom kent geer ein oetgebreid versjlaag laeze van al dees belaefenisse. De foto’s en video’s die gemaak zeen kent geer zo wie geweunlik trökvenje is ons fotobouk en media gedeilte. Klik hiej onger op de link om de sfeerimpressie te laeze of es geer neit kent wachte hiej om direk nao os fotobouk te gaon.

Veer wille veuraaf waal alvas de reis organisaase bedanke die dit bezunjere lustrum reiske höbbe bedach en georganiseijerd, alles waar fien verzörg en door de leede van ut eesjte moment prima geregeld.

- Sfeerversjlaag Volendam reiske 2009

KKG zet koers richting Volendam

luc — Fri, 20 Nov 2009 12:00:53 +0000

Op dit moment van sjrieve haet bienao ut voltallige leedebestandj van Klup Kump Gout koers gezat veur òs reiske richting Volendam! Veer zeen vanmiddig rondj de klok van 1 oer beijeingekomme op ein centrale plaatjs in Zitterd en zeen van dao oet vetrokke veur 3 daag mit ein böske richting ut palingdörp.

‘t Zal ein speciaal editie waere, aangezeen dit reiske onger angere ter gelaeg van os vief jaorig jubileum georganiseijerd is. Dao bie zeen veer auch nog nooit op reis gegange mit zo’n groot aantal leede van de klup. Bienao jederein haet 3 daag vriej kenne maake veur dees bezunjere aktiviteit. Veer zeen d’r van euvertuug dat de kommende daag bol zulle sjtaon van de ludieke momente en oetsjpraoke. Veur de meiste reizigers is ut programma onbekend en laote zie zich verrasje mit waat komme geit. D’r zulle auch ongetwiefeld weijer ein ganse rits foto’s en video’s gesjaote waere en wae wit nuut materiaal veur de Zittesje Prive?!

Es veer weijer trök in ‘t Zuuje zeen, zulle dees foto’s en filmkes zo sjnel muigelik geplaatsj waere op dees site. Auch zal d’r dan ein oetgebreide sfeerimpressie gesjreeve waere om uch ein indrök te gaeve euver os belaevenissen. ‘t Waer is alvas gout, neit kauwt en ‘t zunke sjient lekker! Chauffeur, zeen veer d’r bienao? Jao zaet hae…hoogste tied dus om aaf te sjloete! Pès maondig es v’r weier trök zeen in Zitterd.