Klup Kump Gout » Vastelaovend

Äöpening sezoen 2010

Hero — Mon, 08 Nov 2010 09:11:05 +0000

Op zóndig 14 november 2010 zal Zitterd om 13.55 oere mit ein enorm feessjpektakel ’t vastelaovessezoen äöpene. Dees äöpening zal veur de veierde keer plaatsj vènje oppe mert in Zitterd.

Veur ’t pregramóngerdeil “zèng mit dien vastelaovesidool” höbbe ein groot aantal bekènde artiste: Big Benny, Fabrizio, W-Dreej, Toddezèk en Kartoesj, zich weier bereid gevónje om mit kènjer van Zittesje basissjoole op te traeje.

Zitterd bewaeg in de vastelaovesmix
Ozze 79e sjtadsprins (en lid van Kump Gout) Wouter I, in ’t dagelijks laeve baeter bekènd es DJ “Ben Bastion”, zal in saamewirking Sjtadsvastelaovesvereiniging de Marotte zörge veur ein primeur! ’t Auwt vastelaovesnummer “ ’t eesjte muulke” oet 1979 (Jack Vahsen en Bert Coenen) is vólledig in ein nuujt jeske gesjtaoke. Dees opzwepende mix leent zich bie oetsjtèk om op te bewaege. Dit is dan ouch waat De Vlemkes en Marotte vraoge aan de jeug. In saamewirking mit de dansgróp Swentibold haope zie de ganse Zittesje mert te laote bewaege!

Wilt geer alvas rippeteiere? Kiek dan nao ‘t ongersjtaonde filmke:

www.youtube.com/watch?v=_rX7hQJnFjU

Kiek veur mee informaase op www.marotte.nl of www.devlemkes.nl

W-Dreej oet Venlo wint 34ste LVK

Hero — Sun, 07 Feb 2010 08:15:24 +0000

In ein finale mit meerdere gouw vastelaovessjlaagers haet W-Dreej aafgeloupe vriejdig (mit aafsjtand) ‘t LVK gewonne. Ein ruume meerderheid van de versjillende sjuuries gouf hun 19 punt aan W-Dreej, hun totaal 128 punte. Klup Kump Gout filleseteird W-Dreej mit hunne sjlaager ‘Vandaag’ En heisj hun alvas van harte wilkom op de bennesjtad zitting van 2011 op 20 fibberwaari wo zie ouch weier akte de présence zulle gaeve.

Vanzelfsjpraekend filleseteiere veer ouch de euverige LVK finaliste en in ‘t bezunjer de twee finaliste oet òs sjtad Trio-046, en Kartoesj!

Bènnesjtad Zitting 2010

luc — Sun, 24 Jan 2010 12:00:52 +0000

Volgende waek is ut weijer zo wiet, dan sjteit namelijk de jaorlijkse Bènnesjtadzitting bie Cafe de buren weijer op ut program!

Auch dit jaor höbbe veer in saame wirking mit Cafe de Buren d’r veur gezörg dat geer ein fien program mit artiste krig geprizzenteierd. De artiste die deeze daag zulle komme optrae zeen onger angere; De Toddezek, Bram & Ruud, De Shakin’ DJ’s. Frans Croonenberg, Aafsjlaag Zitterd, Richard Huwae, Thorsten von Lippe Biesterfeld en nog mee en nog mee en nog vööl mee. Ein gevarieierd program volges òs, mer ut wurt nog sjoonder…

Dees Zitting is namelijk gratis te bezuike! Geer laes ‘t gout de entree is vriej deeze daag en zeet geer dus alleney van harte wilkom om saame mit os d’r weier ein onvergaetelijke vastelaovesmiddig van te maake! De zitting zal vanaaf 11 minuute euver 12 beginne. Pès Zondig!

Installatie & Receptie Prins Wouter I

luc — Wed, 20 Jan 2010 14:02:02 +0000

Kommende Zaoterdig is ut zo wiet, dan wurt os KKG-lid Wouter Simons officiëel geinstaleijerd tot Stadsprins Wouter I in de sjouwburg in Zitterd! De daag d’r nao op Zondig zal de receptie plaatsjvenje wo jederein Wouter proficiat kent wunsje mit zien prinssjap.

Auch veer es Klup Kump Gout zulle hiej biej aanwezig zeen. Saame mit zien vrunj, femieje en anger aanverwanten, zulle alle leede van os vereiniging mithelpe om Wouter op ein ludieke meneijer op te brenge. Enkele leede zulle auch ein spraekende rol op zich numme en de res haet de lestige taak om veural zichzelf te speele.Veer kenne uch noe nog neit te väöl dinger verklappe, mer d’r vilt in eder geval get te lache. En wo Wouter zal versjiene? Auch dat is veur uch nog ein verrassing.

Zeet geer auch benuujd wie Wouter zal sjittere in zien Prinsepekse? en wiej hae zal opgebrach waere? Kom dan allemaol kieke Zaoterdig om 20:00 oere in de sjtadssjouwburg in Zitterd. En angesj zeen veer uch mesjien oppe prinserecpetie in de Stadbroekermeule tösje 13:00 en 15:00 oere.

Wouter Simons Sjtadsprins 2010!

Hero — Sun, 03 Jan 2010 01:12:50 +0000

En of dat eine bekende van òs is! Op 2 jannewaari is in ein vòl sirkestent Wouter Simons oetgeruipe es sjtadsprins 2010 van De Marotte Zitterd! De aansjtaonde hoogheid is al get langer lid van òs vereiniging, al zal hae dit jaor get minder tied veur òs klupke höbbe. Mèr des te mee tied höbbe veer veur haom.

Wouter, Names Klup Kump Gout filleseteire veer dich mit dien benuiming es 79e sjtadsprins van Zitterd en wunsje dich en dien femieje ein geweldig sjoon sezoen. Mèr dat Kump ongetwiefeld Gout.

Wilt geer mee weite euver de aanstjtaonde hoogheid kiek dan nao zien leede pagina op deeze site of wie geweun op zien prinsepagina oppe Marotte site.

Es geer de oetruiping én de reakse oet de tent wilt zeen en heure bekiek dan ‘t filmke van Marotte TV hiejonger.

www.youtube.com/watch?v=lRPblTSGXJ4

Kamera Jean Geurts, Versjlaag Tom Jessen. Wilt geer mee filmkes zeen van de Marotte bekiek ze dan oppe sjpesjaal Marotte TV pagina.

Väölbelaovende sjtart Vastelaovessezoen!

luc — Mon, 16 Nov 2009 16:40:36 +0000

Gistermiddig haet op de mert in Zitterd de äöpening van ut nuuje vastelaovessezoen plaatsjgevonje. Ondanks ut matige waer waar de mert redelijk gout gevöld mit luuj. Op ut podium vonje enkele optrae plaatsj van artiesten wie beppie kraft, big benny en frans theunisz.

Nao aafloup van deeze middig vonj de door KKG mede georganiseijerde Afterparty in Cafe de Buren plaatsj. Auch hiej höbbe Frans Theunisz en Beppie Kraft ein fien optrae verzörg en zout de sjtömming d’r gout in. Dit belaof natuurlik get veur ut aankommende sezoen wo in auch Klup Kump Gout weijer actief aan zal gaon deilnumme.

Kiek hiej onger dit berich of in os fotobouk veur enkele foto’s van deeze afterparty. Ein van de kommende daag zulle d’r auch nog ein deil sfeerfilmkes op dees website versjiene tegeliekertied mit ein nuut website ongerdeil waat uniek is veur os vereiniging. Dit is get wo veer noe nog neit te väöl euver kenne zegge, laot uch mer verrasje! Hauwt alles hiej mer gout in de gaate de kommende tied!

Alaaf!

Hero — Wed, 11 Nov 2009 09:11:37 +0000

Einteliks ‘t is de 11e van de 11e en 11oere 11 gewaes! V’r kenne de rood-gael-gruin vastelaovesvlag weier oetsjtaeke! De kop is d’r aaf en ‘t vastelaovessezoen is gestart, en waat veur ein sezoen. ‘t Zal ein jubbeleiem sezoen waere veur Klup Kump Gout. ‘t Viefde jaor en ‘t eesjte lustrum, ofsjoon v’r eigelik nog mèr sjus komme kieke zeen v’r d’r toch waal greutsj op.

Aansjtaonde zòndig zal d’r oppe offesjeel aopening weier drök gesjpikkeleierd waere wae de nuuje prins wurt… Zal hae bekend zeen in Zitterd of wurt ‘t eine prins dae v’r alleney nog motte leere kenne, wae wit. Messjien zit d’r waal biej òs in de vereiniging… Veer laote òs in jeeder geval verrassje waat Vors Haarie oet zien Marotte mötsj touvert.

Alaaf!

Op nao de aopening van ‘t sezoen!

Hero — Fri, 06 Nov 2009 16:37:17 +0000

Mit nog ein klein waekske te gaon richting de “ellefde-van-de-ellefde” maak Limburg zich weier op veur de Aopening van ‘t vastelaovessezoen 2009-2010.

Zondig 15 november is in Zitterd naamelik neit allein de offisjeel aopening door de Marotte mèr kent geer ouch nog ein gout nao geneite oppe Aopening Sezoen ‘AfterParty’ biej kefee de Buren. De entree is vriej ein de artiste leige d’r neit om. Zowaal Beppie Kraft es ouch Frans Theunisz gaeve akte de présence.

Mit de Oktoberfeeste nog frisj in ‘t geheuge geit Klup Kump Gout d’r dus weier vòl taege aan. ‘t Idee veur de vastelaovend lik vaerdig en sjteit zelfs al gedeiltelik in de sjtiegesj. ‘t Belaof waat òs betruf eine sjoone sezoen te waere!