Ein historie kenne v’r ‘t nog neit ech nuime, al begint ‘t nao vief jaor dao waal al langzaam op te lieke… Biej eur goutvènje hauwte veer ‘t veuralsnog aevekes op “‘t Begin van Klup Kump Gout”
27 november 2004…
Ein aantal jaore leipe versjillende van òs leede dèks mit “Klup Wo-Van” mit in de Groote optoch van Zitterd. Jaomergenog koosjte dees leede in 2005 neit mee in die saamesjtelling deilnumme aan d’n optoch. Hiejdoor haet me zich doe biejein gepak om toch es gròp mit te kenne doon aan d’n optoch. De veier -laatere oprichtesj van de vereiniging- pakte zich dus biejein en brachte vööl aovende door in café De Buure om mit ein idee te komme. Meistal waor dit oppe maondig omdat ‘t bòkbeier dan veur eine euro waor en oppe gounsdig gezeen dae aovend “vaeskes” getap woorte. Mee es ens woorte zie (Sander Houben, Ramon Houben, Roger Bormans en Robert Verberne) dan ouch rondj ‘t sjleitingsoer van twee d’roet gesjmeete… zònger ein idee.
Eine naam veur de vereiniging waar euverigens waal sjnel gevonje: “Al-aaf!” Toepasselik waor ‘t zeeker neit, gezeen d’r nao maonje vergaadere nog altied gein idee waor, pès ‘t moment dat eine op 27 november “Kump Gout!” zag… Toepasselik zeeker, leuke naam, klink gout, èn inèns ein ongerwerp veur d’n optoch! Kump Gout! de vereiniging woort opgerich…
‘t eesjte sezoensjaor in 2005
Waat neemes hauw verwacht dat jaor waor dat Roger sjtadsprins woort van Zitterd. Naamsbekendheid waor gegarandeierd, zeeker noe de ‘hoogheid’ zien motto aafsjloot mit de weurd Kump Gout, waat wilt me nog mee…
In meert 2005 is de eesjte aanvölling gedaon oppe jòng vereiniging. Luc Göttgens (lid van Klup Wo-Van) Daniël Moreaux (auch lid van Klup Wo-Van) en Martijn Könings bleeke alledrie ein aanwins te zeen veur de klup. Laater dat jaor woort d’r nog eine auw prins es achtste lid toegevoug aan de vereiniging. Dit waor de prins van 2003 Ruud Meuwissen. Hae bleek auch waal zin te höbbe om bie ‘t klupke te komme. Gezeen zien wirk woort hae metein mit de titel “Webmeister van Kump Gout” gekroond.
Vööl nuuts in 2006
Saer 2006 begoosj Kump Gout ouch mit ‘t mitdenke en organiseieren van ein aantal evenemente. In de aanloup nao de vastelaovend woort de eesjte Bènnesjtad Zitting georganiseierd biej café De Buren. Mit ein aantal gouw Limburgse artiste waor dit eesjte jaor ein klein mèr zeeker leuke zitting. Nuimeswaerdig is de Eerepries (kategorie Klein gròppe) biej de tweede Groote optoch dae v’r leipe! Ein grandijoos sukses…
In ‘t jaor dat vööl tradiesses van òs vereiniging ontsjtange zeen besjlaote v’r ouch veur de eesjte maol ein oetsjtepke te planne. In ‘t waekenj van 14 & 15 juni trokke v’r in de richting van Gent om dao mit ein aantal leede d’r ein gesjlaag oetsjtepke van te maake. Later dat jaor woort d’r biej de 2e ediese van de Oktoberfeeste ouch de eesjte Limburgse middig georganiseierd. Eine middig mit mee artiste ein zaate hermeniej en mee publiek.
Ouch waat betruf de leede sjtònge v’r in 2006 zeeker neit sjtil. Mit Luc Bormans en Wouter Simons in rispektivelik fibberwaari en meert vònje v’r òs neugende en teende lid.
Ein relatief röstig jaor (2007)
Vanzelfsjpraekend leipe v’r ouch in 2007 mit in de optoch en organiseierde v’r in de aanluip nao de vastelaovend weier ein Bènnesjtad Zitting. Op 19 meert (St. Joep) vònje veer òs elefde lid in de persoon van Leroy Hallatu. Omdat ‘t reiske gout bevalle waor besjlaote v’r dit jaor nao de Belsje Ardenne te gaon. In ein huske aan de randj van de boes koosjte v’r in principe doon waat v’r neit laote koosjte… Geammezeierd höb v’r os zeeker en zelfs zo gout dat v’r datzelfde jaor nog ein tweede bezuik brachte.
2008: Aevekes door zwaor waer, mèr ‘t Kump Gout!
Ein deiptepunt woort bereik bie de optoch van 2008. Alles waor zo sjoon gepland en oetgedach, waeke langk gesjilderd en gesjoesterd en toen op de vastelaoves zondig leit de meziek òs in de sjteek… Ein groot kontras mit ‘t sukses van twee jaor geleeje. Geine pries, gein eer helemaol niks, ein zwaor begin van ein nuujt sezoen. Aangeslaage waat òs waor euverkomme höb v’r doe mee es ens motte zegge taege os zelf “Hauwt moud, Kump Gout!”
Drèk nao de vastelaovend en nao ruum drie jaor praeses van de vereiniging te zeen gewaes vònj Sander ‘t tied om de haamer euver te draage aan ein anger lid. Mit ein besjlissende stömrunj woort -mit sjlechs ein stöm mee- Ruud Meuwissen gekaoze pès nuuje praeses van de vereiniging.
In ‘t veierde vereinigingjaor vònje v’r drie nuuj leede. Arno Laurent Dieteren, woort in meert toegevoug aan de vereiniging, Jean-Paul Schmeitz en Jelle Simons in de maondj september dao-opvolgend. Klup Kump Gout waor in veier jaor tied oetgegruid pès ein jònge, ambitieuze en richting Zittesje vereiniging.
Neit allein de vereiniging gruide, ouch òs twee evenemente gruide mit òs mit. Zo is de Limburgse Middig ein evenement gewoore wo jeeder jaor mee bezuikersj op aaf komme en höbbe v’r oppe Bènnesjtad Zitting sjtadsvastelaovesvereiniging “De Marotte” mee es eins maoge ontvange. Ondanks de sjlechte sjtart maoge v’r toch neit klaage. Ouch 2008 waor ein gout vereinigingsjaor!
Ein nuujt evenement veur Zitterd en Kump Gout in 2009
Me zaet dat alles waat in Zitterd mee es twee jaor achterein gedaon wurt pès ‘tradiese’ geraekend wurt. Wie me dus van Kump Gout gewend is hauwe ouch in 2009 weier ein Bènnesjtad Zitting en eine Limburgse Middig. In december van 2008 höbbe de leede van òs vereinigin de köp biejein gesjtaoke om ein nuujt evenement op te zette, ein zeipkiste race.
De Eesjte Zittesje Zeipkiste Race: nuuj en ouch weier neit… Nao get ongerzuik bleeke d’r al rondj de oorlogsjaore zeipkiste races gehaute te zeen. Sjpraekender is dat de vereiniging wo Kump Gout ein bietje vanaaf kump (Wo-Van) al ideeje hauw om deeze race nuuj laeve in te blaoze. Jaomergenog zout ‘t hun aevel neit mit om de vergunninge mit de gemeinte rondj te kriege.
Bliej waore zie dan ouch wie veer hun koosjte vertelle dat ‘t òs waal gelök waor om de vergunning te arrangeiere èn dat veer ‘t leuk feyn zouwe venje es veer saame mit hun dit evenement koosjte organiseiere. De race bleek ein gaat in de mert te zeen, vööl deilnummesj en ondank sjlech waer toch ein houp toesjouwesj. Ein vööl belaovend rizzeltaat veur de toekoms!
Ouch in 2009 waor d’r weier ein nuujt lid veur de vereiniging, Martin Hendricks en ouch hae bleek zich al metein gout te vuile bènne de gròp. Mit de optoch, ‘t Sjöttefees en versjillende oetsjtepkes waor ouch 2009 weier ein drök jaor mit vööl aktiviteite. Mèr toch ontbrouk d’r ein dènk aan 2009: ‘t traditioneel reiske!
Ein waek veur òs eesjte lustrum trappe veer op 20, 21 & 22 november òs eesjte jubbeleium jaor aaf mit ein reiske nao Volendam. Vriejwaal alle leede gaon mit en zeen vasbesjlaote om d’r ein sjoon jubeljaor van te maake. Wie v’r dat alleney gaon doon laes g’r op de pagina jubeleiemjaor.
De eesjte vief jaor waore neit altied aeve gemellelik mèr v’r höbbe òs zeeker geammezeierd en saame vööl gelache. Mit de organisaase van ein aantal sjoon evenemente wille v’r ouch de kommende vief jaor d’r weier vol taegenaan!
Kump Gout!
