Op 27 november 2009 besjteit Klup Kump Gout vief jaor, en dat wurt gevierd. Spesjaal veur dit gelaeg höbbe veer òs jaorlikse reiske oetgesjteld pès november om dan saame mit alle leede ein langk waekenj nao Volendam te gaon. Gesjlaag is dat oetsjtepke zeeker. Neit allein de leede mer ouch Volendam kalt dao zelfs nog euver… (Laote v’r zegge in de positieve zin van ‘t woord)
2010: Ein jubeleium jaor én ein Prinselik rendje…
Ein gout begin, baeter ken me ein jaor neit sjtarte. En dat höbbe v’r dan ouch zeeker gedaon! Saame mit òs daames höbbe veer biej Der Gulden Haen ein besjlaote Silvesterfeeske gevierd. Ongerwiel deeze aovend nog drök gesjpikkeleierd woort euver de nuuje prins woort daags daonao ein van òs leede es 79e sjtadsprins van de Marotte Zitterd benuimp. Wouter Simons! Hae zal ‘t driede lid mit prinselik bloud zeen… Ein sjoon begin van ‘t jaor… “Kump Gout!”
Vastelaovend 2010
De vastelaovend van 2010 geit ouch es eine onvergaetelikke de buiker in. Kump Gout brach saames mit eine houp angere toch `ziene prins´ oppe buhn. ´t Prinssjap van Wouter koum eigelik waal gout oet. Aangezeen v’r nog gein idee hauwe veur de optoch zoute v’r toch waal ein bietje in de knuip. Gelokkig moch Kump Gout op de prinse waage sjtaon en zo bliek mer weier Kump Gout!
V’r zeen ouch aevel kritisch op oszelf. De Bennesjtad zitting trok dit jaor minder bezuikesj es veurgaonde jaore. Gekeeke wurt nao anger alternatieve eine anger opzat en muigelikhede om de promotie wiejer te verbaetere. Wurt aan gewirk dus! ‘t Vastelaoves sezoen woort in jeeder geval waal feyn aafgeslaote door gezaamelik mit de prinselikke femieje es beeste en anger sirk artiste op daensdig door de sjtad te trekke. Messjien alweier ein veurpruifke veur de oetruipingszitting van 2011… wae wit!
Veurjaor
Tradisjoneel haet ongernum Kump Gout (boete get vergaaderninge) neit vool sjpesjaals. Jeederein mot nog biejkomme van de vastelaovend of is nog get paosjeikes aan ‘t zuike danwaal koppe. Waal wurt d’r drok georganiseierd veur de aankommende evenemente.
2e Zittesje Zeipkiste Race
Ein groot succes waor de Zeipkiste Race. Ein paar doezend luuj (sjattinge 3.000) trekke nao de Kolleberg om dao nao de race te kieke. Boete eine zjwaore crash van ein paar ongelokkige deilnummesj waore d’r gein zwaor ongelokke. ‘t Medisch personeel waor sjnel aanwezig en de verzorging waor naovenant.
Ouch hie weier ein kritische noot. Ofsjoon ‘t veur de bezuikesj eine sjoone daag is gewaes zeen ouch hiej weier eine houp aandachs punte nao baove gekomme. Alleney om ‘t volgend jaor pes ein nog grooter succes te maake. Veer zeen d’r in jeeder geval weier vaerdig veur en hobbe alweier vool zin d’r in!
